ਸੰਸਦ ਭੰਗ ਹੋਣ ਨਾਲ ਚੋਣ ਪ੍ਰਕਿਰਿਆ ਦਾ ਰਸਮੀ ਪੜਾਅ ਸ਼ੁਰੂ, 7 ਨਵੰਬਰ ਨੂੰ ਪੈਣਗੀਆਂ ਵੋਟਾਂ
ਵੈਲਿੰਗਟਨ : ਆਪਣਾ ਪੰਜਾਬ ਮੀਡੀਆ : ਨਿਊਜ਼ੀਲੈਂਡ ਦੀ 54ਵੀਂ ਸੰਸਦ 1 ਅਕਤੂਬਰ 2026 ਨੂੰ ਭੰਗ ਕਰ ਦਿੱਤੀ ਗਈ ਹੈ, ਜਿਸ ਨਾਲ 7 ਨਵੰਬਰ ਨੂੰ ਹੋਣ ਵਾਲੀ ਆਮ ਚੋਣ ਲਈ ਰਸਮੀ ਚੋਣ ਪ੍ਰਕਿਰਿਆ ਅੱਗੇ ਵਧ ਗਈ ਹੈ। ਨਿਊਜ਼ੀਲੈਂਡ ਦੇ ਚੋਣ ਕਮਿਸ਼ਨ ਮੁਤਾਬਕ 2026 ਦੀਆਂ ਆਮ ਚੋਣਾਂ ਸ਼ਨੀਵਾਰ, 7 ਨਵੰਬਰ ਨੂੰ ਹੋਣਗੀਆਂ।
ਸੰਸਦ ਦੇ ਭੰਗ ਹੋਣ ਤੋਂ ਬਾਅਦ 4 ਅਕਤੂਬਰ ਨੂੰ Writ Day ਹੋਵੇਗਾ, ਜਦੋਂ ਗਵਰਨਰ-ਜਨਰਲ ਚੋਣ ਕਰਵਾਉਣ ਲਈ ਚੋਣ ਕਮਿਸ਼ਨ ਨੂੰ ਰਸਮੀ ਹਦਾਇਤ ਜਾਰੀ ਕਰਨਗੇ। ਉਮੀਦਵਾਰਾਂ ਲਈ ਨਾਮਜ਼ਦਗੀ ਦੀ ਆਖਰੀ ਮਿਤੀ 8 ਅਕਤੂਬਰ ਹੈ, ਜਦਕਿ ਵਿਦੇਸ਼ਾਂ ਤੋਂ ਵੋਟਿੰਗ 21 ਅਕਤੂਬਰ ਤੋਂ ਸ਼ੁਰੂ ਹੋਵੇਗੀ।
26 ਅਕਤੂਬਰ ਤੋਂ ਅਗਾਊਂ ਵੋਟਿੰਗ ਸ਼ੁਰੂ ਹੋਵੇਗੀ ਅਤੇ 6 ਨਵੰਬਰ ਤੱਕ ਜਾਰੀ ਰਹੇਗੀ। ਚੋਣ ਵਾਲੇ ਦਿਨ ਵੋਟਿੰਗ ਸਥਾਨ ਸਵੇਰੇ 9 ਵਜੇ ਤੋਂ ਸ਼ਾਮ 7 ਵਜੇ ਤੱਕ ਖੁੱਲ੍ਹੇ ਰਹਿਣਗੇ। ਮੁੱਢਲੇ ਨਤੀਜੇ ਚੋਣ ਵਾਲੀ ਸ਼ਾਮ ਤੋਂ ਜਾਰੀ ਹੋਣੇ ਸ਼ੁਰੂ ਹੋ ਜਾਣਗੇ, ਜਦਕਿ ਅਧਿਕਾਰਤ ਨਤੀਜੇ 27 ਨਵੰਬਰ ਨੂੰ ਐਲਾਨੇ ਜਾਣੇ ਹਨ।
ਚੋਣ ਤੋਂ ਪਹਿਲਾਂ ਸੰਸਦ ਦੀ ਆਖਰੀ ਬੈਠਕ 23 ਸਤੰਬਰ ਨੂੰ ਹੋਈ ਸੀ। ਹੁਣ ਰਾਜਨੀਤਿਕ ਪਾਰਟੀਆਂ ਵੱਲੋਂ ਚੋਣ ਮੁਹਿੰਮ ਨੂੰ ਤੇਜ਼ ਕੀਤਾ ਜਾ ਰਿਹਾ ਹੈ ਅਤੇ ਵੋਟਰਾਂ ਸਾਹਮਣੇ ਵੱਖ-ਵੱਖ ਨੀਤੀਆਂ ਅਤੇ ਮੁੱਦੇ ਰੱਖੇ ਜਾਣਗੇ।
