ਵ੍ਹਾਈਟ ਹਾਊਸ ਦੀ ਸਜਾਵਟ ਨੂੰ ਲੈ ਕੇ ਟਰੰਪ ਅਤੇ ਓਬਾਮਾ ਵਿਚਾਲੇ ਸ਼ਬਦੀ ਜੰਗ ਤੇਜ਼; ਸੋਨੇ ਦੀ ਸਜਾਵਟ ਅਤੇ ਨਵੇਂ ਬਾਲਰੂਮ ਨੂੰ ਲੈ ਕੇ ਸਾਬਕਾ ਰਾਸ਼ਟਰਪਤੀ ਨੇ ਉਡਾਇਆ ਸੀ ਮਜ਼ਾਕ
ਵਾਸ਼ਿੰਗਟਨ — ਆਪਣਾ ਪੰਜਾਬ ਮੀਡੀਆ। ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਸਾਬਕਾ ਰਾਸ਼ਟਰਪਤੀ ਬਰਾਕ ਓਬਾਮਾ ਵਿਚਾਲੇ ਵ੍ਹਾਈਟ ਹਾਊਸ ਦੀ ਸਜਾਵਟ ਅਤੇ ਨਵੀਨੀਕਰਨ ਨੂੰ ਲੈ ਕੇ ਸ਼ਬਦੀ ਜੰਗ ਤੇਜ਼ ਹੋ ਗਈ ਹੈ। 26 ਅਕਤੂਬਰ 2026 ਨੂੰ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਟਰੰਪ ਨੇ ਓਬਾਮਾ ਦੇ ਤਨਜ਼ ਦਾ ਜਵਾਬ ਦਿੰਦਿਆਂ ਕਿਹਾ ਕਿ ਵ੍ਹਾਈਟ ਹਾਊਸ ਦੀ ਸਜਾਵਟ ਦੀ ਤੁਲਨਾ ‘ਚੀਜ਼ਕੇਕ ਫੈਕਟਰੀ’ ਨਾਲ ਕਰਨਾ ਦਿਖਾਉਂਦਾ ਹੈ ਕਿ ਓਬਾਮਾ ਇੱਕ ਮਾੜੇ ਰਾਸ਼ਟਰਪਤੀ ਕਿਉਂ ਸਨ। ਟਰੰਪ ਨੇ ਆਪਣੇ ਵੱਲੋਂ ਕਰਵਾਏ ਗਏ ਨਵੀਨੀਕਰਨ ਦਾ ਬਚਾਅ ਕਰਦਿਆਂ ਕਿਹਾ ਕਿ ਇਮਾਰਤ ਦੀ ਮੁਰੰਮਤ ਦੁਨੀਆ ਦੇ ਉੱਤਮ ਕਾਰੀਗਰਾਂ ਤੋਂ ਕਰਵਾਈ ਗਈ ਹੈ ਅਤੇ ਹੁਣ ਵ੍ਹਾਈਟ ਹਾਊਸ ਪਹਿਲਾਂ ਨਾਲੋਂ ਬਿਹਤਰ ਹਾਲਤ ਵਿੱਚ ਹੈ।
ਦਰਅਸਲ, ਬਰਾਕ ਓਬਾਮਾ ਨੇ 24 ਅਕਤੂਬਰ ਨੂੰ ਓਹਾਇਓ ਵਿੱਚ ਡੈਮੋਕ੍ਰੇਟਿਕ ਪਾਰਟੀ ਦੀ ਚੋਣ ਰੈਲੀ ਦੌਰਾਨ ਟਰੰਪ ਦੇ ਨਵੀਨੀਕਰਨ ਪ੍ਰਾਜੈਕਟਾਂ ’ਤੇ ਵਿਅੰਗ ਕੱਸਿਆ ਸੀ। ਉਨ੍ਹਾਂ ਨੇ ਕਿਹਾ ਕਿ ਟਰੰਪ ਵ੍ਹਾਈਟ ਹਾਊਸ ਦੀ ਸਜਾਵਟ ਵਿੱਚ ਬਹੁਤ ਜ਼ਿਆਦਾ ਦਿਲਚਸਪੀ ਲੈ ਰਹੇ ਹਨ ਅਤੇ ਇਮਾਰਤ ਨੂੰ ਇਸ ਤਰ੍ਹਾਂ ਸਜਾਇਆ ਗਿਆ ਹੈ, ਜਿਵੇਂ ਇਰਾਕ ਦੇ ਸਾਬਕਾ ਤਾਨਾਸ਼ਾਹ ਸੱਦਾਮ ਹੁਸੈਨ ਨੇ ਉੱਥੇ ‘ਚੀਜ਼ਕੇਕ ਫੈਕਟਰੀ’ ਖੋਲ੍ਹ ਲਈ ਹੋਵੇ। ਓਬਾਮਾ ਨੇ ਵ੍ਹਾਈਟ ਹਾਊਸ ਵਿੱਚ ਸੋਨੇ ਦੀ ਵਧੇਰੇ ਵਰਤੋਂ, ਰੋਜ਼ ਗਾਰਡਨ ਵਿੱਚ ਕੀਤੀਆਂ ਤਬਦੀਲੀਆਂ ਅਤੇ ਵਿਸ਼ਾਲ ਬਾਲਰੂਮ ਬਣਾਉਣ ਦੀ ਯੋਜਨਾ ’ਤੇ ਵੀ ਸਵਾਲ ਚੁੱਕੇ।
