ਆਕਲੈਂਡ ਟ੍ਰਾਂਸਪੋਰਟ ਦੇ ਮੁਖੀ ਡੀਨ ਕਿੰਪਟਨ ਨੇ ਆਪਣੇ ਅਹੁਦੇ ਤੋਂ ਦਿੱਤਾ ਅਸਤੀਫਾ

ਆਪਣਾ ਪੰਜਾਬ ਮੀਡੀਆ :  ਆਕਲੈਂਡ ਟ੍ਰਾਂਸਪੋਰਟ (Auckland Transport) ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਡੀਨ ਕਿੰਪਟਨ ਨੇ ਐਲਾਨ ਕੀਤਾ ਹੈ ਕਿ ਉਹ 1 ਮਈ 2026 ਨੂੰ ਆਪਣਾ ਅਹੁਦਾ ਛੱਡ ਦੇਣਗੇ। ATਬੋਰਡ ਦੇ ਚੇਅਰਮੈਨ ਰਿਚਰਡ ਲੈਗਟ ਨੇ ਕਿਹਾ ਕਿ ਪਿਛਲੇ ਤਿੰਨ ਸਾਲਾਂ ਦੌਰਾਨ ਡੀਨ ਕਿੰਪਟਨ ਦੀ ਅਗਵਾਈ ਹੇਠ ਸੰਸਥਾ ਨੇ ਵੱਡੇ ਨਤੀਜੇ ਹਾਸਲ ਕੀਤੇ ਹਨ ਅਤੇ ਉਹਨਾਂ ਦੀ ਸੇਵਾ ਲਈ ਆਕਲੈਂਡ ਵਾਸੀਆਂ ਦੇ ਧੰਨਵਾਦੀ ਹਨ। ਉਨ੍ਹਾਂ ਦੱਸਿਆ ਕਿ ਕਿੰਪਟਨ ਦੇ ਨੇਤ੍ਰਤਵ ਹੇਠ ਆਕਲੈਂਡ ਟ੍ਰਾਂਸਪੋਰਟ ਨੇ ਆਪਣੇ ਸਭ ਤੋਂ ਵੱਡੇ ਪੂੰਜੀ ਪਰੋਗਰਾਮਾਂ ਨੂੰ ਲਾਗੂ ਕੀਤਾ, ਜਨਤਕ ਆਵਾਜਾਈ ਲਈ ਨਵੇਂ ਭੁਗਤਾਨ ਤਰੀਕੇ ਸ਼ੁਰੂ ਕੀਤੇ, ਸੇਵਾਵਾਂ ਦੀ ਆਵ੍ਰਿੱਤੀ ਵਧਾਈ ਅਤੇ ਤਕਨਾਲੋਜੀ ਦੀ ਵਰਤੋਂ ਨਾਲ ਨੈੱਟਵਰਕ ਦੀ ਕਾਰਗੁਜ਼ਾਰੀ ਸੁਧਾਰੀ। ਇਹ ਅਸਤੀਫ਼ਾ ਉਸ ਸਮੇਂ ਆਇਆ ਹੈ ਜਦੋਂ ਆਕਲੈਂਡ ਕੌਂਸਲ ਅਤੇ ਸਰਕਾਰ ਵੱਲੋਂ ਟ੍ਰਾਂਸਪੋਰਟ ਸੰਸਥਾ ਵਿੱਚ ਸੁਧਾਰ ਕੀਤੇ ਜਾ ਰਹੇ ਹਨ, ਜਿਸ ਅਧੀਨ ਯੋਜਨਾ ਬਣਾਉਣ ਅਤੇ ਸੜਕ ਨਿਯੰਤਰਣ ਵਾਲੇ ਕੰਮ ਕੌਂਸਲ ਦੇ ਅਧੀਨ ਲਿਆਂਦੇ ਜਾਣਗੇ, ਜਦਕਿ ਆਕਲੈਂਡ ਟ੍ਰਾਂਸਪੋਰਟ ਭਵਿੱਖ ਵਿੱਚ ਸਿਰਫ਼ ਜਨਤਕ ਆਵਾਜਾਈ ਏਜੰਸੀ ਵਜੋਂ ਕੰਮ ਕਰੇਗੀ।