ਆਪਣਾ ਪੰਜਾਬ ਮੀਡੀਆ : ਪੀ ਜੀ ਆਈ ਚੰਡੀਗੜ੍ਹ ਦੇ ਡਾਕਟਰਾਂ ਨੂੰ ਐਲੂਮੀਨੀਅਮ ਫਾਸਫਾਈਡ ਜਿਸ ਨੂੰ ਆਮ ਕਰ ਕੇ ਸਲਫਾਸ ਕਿਹਾ ਜਾਂਦਾ ਹੈ, ਨਾਲ ਚੜ੍ਹਨ ਵਾਲ ਜ਼ਹਿਰ ਦੇ ਇਲਾਜ ਵਿਚ ਵੱਡੀ ਸਫਲਤਾ ਮਿਲੀ ਹੈ। ਸਲਫ਼ਾਸ ਘਾਤਕ ਕੀਟਨਾਸ਼ਕ ਹੈ। ਪੀ ਜੀ ਆਈ ਨੇ ਬਿਆਨ ਵਿੱਚ ਕਿਹਾ ਕਿ ਉਨ੍ਹਾਂ ਦੇ ਇੰਟਰਨਲ ਮੈਡੀਸਨ ਵਿਭਾਗ ਵਿੱਚ ਕੀਤੀ ਖੋਜ, ਬਹੁਤ ਹੀ ਘਾਤਕ ਸਥਿਤੀ ਵਿੱਚ ਨਵੀਂ ਜੀਵਨ-ਰੱਖਿਅਕ ਥੈਰਪੀ ਦੇ ਰੂਪ ਵਿੱਚ ਇੰਟਰਾਵੇਨਸ ਲਿਪਿਡ ਇਮਲਸ਼ਨ ਦੀ ਪ੍ਰਭਾਵਸ਼ੀਲਤਾ ਨੂੰ ਦਰਸਾਉਣ ਵਾਲਾ ਪਹਿਲਾ ਕਲੀਨਿਕਲ ਅਧਿਐਨ ਹੈ।
ਇਨ੍ਹਾਂ ਅਹਿਮ ਲੱਭਤਾਂ ਨੂੰ ਕੌਮਾਂਤਰੀ ਪੱਧਰ ਦੇ ਰਸਾਲੇ ਯੂਰਪੀਅਨ ਰਿਵਿਊ ਆਫ ਮੈਡੀਕਲ ਐਂਡ ਫਾਰਮਾਕੋਲੋਜੀਕਲ ਸਾਇੰਸਜ਼ ਵਿੱਚ ਪ੍ਰਕਾਸ਼ਿਤ ਕੀਤਾ ਗਿਆ ਹੈ, ਜਿਸ ਨਾਲ ਖੋਜ ਨੂੰ ਆਲਮੀ ਪੱਧਰ ’ਤੇ ਮਾਨਤਾ ਮਿਲੀ ਹੈ। ਇਹ ਅਧਿਐਨ ਡੀਨ (ਅਕਾਦਮਿਕ), ਪ੍ਰੋਫੈਸਰ ਤੇ ਇੰਟਰਨਲ ਮੈਡੀਸਨ ਵਿਭਾਗ ਦੇ ਮੁਖੀ ਡਾ. ਸੰਜੈ ਜੈਨ ਦੀ ਅਗਵਾਈ ਹੇਠ ਕੀਤਾ ਗਿਆ ਹੈ। ਇਸ ਖੋਜ ਨੂੰ ਮੈਡੀਕਲ ਸਿੱਖਿਆ ਅਤੇ ਖੋਜ ਸੈੱਲ, ਪੀ ਜੀ ਆਈ ਐਮ ਈ ਆਰ ਵੱਲੋਂ ਫੰਡ ਕੀਤਾ ਗਿਆ ਸੀ। ਇਸ ਬੇਤਰਤੀਬ ਕਲੀਨਿਕਲ ਅਧਿਐਨ ਦੀ ਅਗਵਾਈ ਡਾ. ਮਨਦੀਪ ਸਿੰਘ ਭਾਟੀਆ, ਐਸੋਸੀਏਟ ਪ੍ਰੋਫੈਸਰ ਆਫ ਇੰਟਰਨਲ ਮੈਡੀਸਨ ਵੱਲੋਂ ਕੀਤੀ ਗਈ ਸੀ, ਜਿਨ੍ਹਾਂ ਨੇ ਪ੍ਰਾਜੈਕਟ ਦੇ ਪ੍ਰਾਇਮਰੀ ਜਾਂਚਕਰਤਾ ਵਜੋਂ ਸੇਵਾ ਨਿਭਾਈ। ਡਾ. ਸੌਰਭ ਚੰਦਰਭਾਨ ਸ਼ਾਰਦਾ ਪੀ ਜੀ ਆਈ ਚੰਡੀਗੜ੍ਹ ਦੇ ਅੰਦਰੂਨੀ ਦਵਾਈ ਵਿਭਾਗ ਦੇ ਹੋਰ ਲੇਖਕਾਂ ਦੇ ਨਾਲ ਸਹਿ-ਜਾਂਚਕਰਤਾ ਸਨ।
