ਭਾਰਤ-ਬ੍ਰਿਟੇਨ ਮਾਈਗ੍ਰੇਸ਼ਨ ਸਮਝੌਤੇ ਤਹਿਤ ਪੜ੍ਹਾਈ ਤੋਂ ਬਾਅਦ ਕੰਮ ਕਰਨ ਦੇ ਰਸਤੇ; ਪਰ ਪੱਕੀ ਰਿਹਾਇਸ਼ (PR) ਆਪਣੇ ਆਪ ਨਹੀਂ ਮਿਲੇਗੀ।
ਲੰਡਨ — ਆਪਣਾ ਪੰਜਾਬ ਮੀਡੀਆ ਭਾਰਤ ਅਤੇ ਬ੍ਰਿਟੇਨ ਵਿਚਾਲੇ ਸਿੱਖਿਆ, ਰੁਜ਼ਗਾਰ ਅਤੇ ਮਾਈਗ੍ਰੇਸ਼ਨ ਸਬੰਧੀ ਸਮਝੌਤਿਆਂ ਨਾਲ ਬ੍ਰਿਟੇਨ ਵਿੱਚ ਪੜ੍ਹਾਈ ਕਰਨ ਦੇ ਚਾਹਵਾਨ ਭਾਰਤੀ ਵਿਦਿਆਰਥੀਆਂ ਲਈ ਕਈ ਮੌਕੇ ਉਪਲਬਧ ਹਨ। ਦੋਵਾਂ ਦੇਸ਼ਾਂ ਵਿਚਾਲੇ 2021 ਵਿੱਚ ਹੋਏ ਮਾਈਗ੍ਰੇਸ਼ਨ ਅਤੇ ਮੋਬਿਲਿਟੀ ਭਾਈਵਾਲੀ ਸਮਝੌਤੇ ਦਾ ਉਦੇਸ਼ ਵਿਦਿਆਰਥੀਆਂ, ਖੋਜਕਰਤਾਵਾਂ ਅਤੇ ਹੁਨਰਮੰਦ ਪੇਸ਼ੇਵਰਾਂ ਦੀ ਕਾਨੂੰਨੀ ਆਵਾਜਾਈ ਨੂੰ ਆਸਾਨ ਬਣਾਉਣਾ ਹੈ।
ਇਸ ਸਮਝੌਤੇ ਅਨੁਸਾਰ ਬ੍ਰਿਟੇਨ ਵਿੱਚ ਅੰਡਰਗ੍ਰੈਜੂਏਟ ਜਾਂ ਮਾਸਟਰਜ਼ ਦੀ ਪੜ੍ਹਾਈ ਸਫਲਤਾਪੂਰਵਕ ਪੂਰੀ ਕਰਨ ਵਾਲੇ ਵਿਦਿਆਰਥੀ ਗ੍ਰੈਜੂਏਟ ਰੂਟ ਤਹਿਤ ਦੋ ਸਾਲ ਤੱਕ ਉੱਥੇ ਰਹਿ ਕੇ ਨੌਕਰੀ ਲੱਭ ਸਕਦੇ ਹਨ ਜਾਂ ਕੰਮ ਕਰ ਸਕਦੇ ਹਨ। ਪੀਐਚਡੀ ਪੂਰੀ ਕਰਨ ਵਾਲਿਆਂ ਲਈ ਇਹ ਮਿਆਦ ਤਿੰਨ ਸਾਲ ਹੈ। ਇਸ ਨਾਲ ਵਿਦਿਆਰਥੀਆਂ ਨੂੰ ਆਪਣੀ ਪੜ੍ਹਾਈ ਨਾਲ ਸਬੰਧਤ ਖੇਤਰ ਵਿੱਚ ਤਜਰਬਾ ਹਾਸਲ ਕਰਨ ਦਾ ਮੌਕਾ ਮਿਲਦਾ ਹੈ।
ਇਸ ਤੋਂ ਇਲਾਵਾ, ਯੋਗਤਾ ਅਤੇ ਨੌਕਰੀ ਦੀਆਂ ਸ਼ਰਤਾਂ ਪੂਰੀਆਂ ਕਰਨ ਵਾਲੇ ਵਿਦਿਆਰਥੀ ਬਾਅਦ ਵਿੱਚ ਸਕਿਲਡ ਵਰਕਰ ਵੀਜ਼ਾ ਵਰਗੇ ਰਸਤੇ ਅਪਣਾ ਸਕਦੇ ਹਨ। ਇਸ ਲਈ ਬ੍ਰਿਟੇਨ ਦੇ ਨਿਯਮਾਂ ਅਨੁਸਾਰ ਯੋਗ ਨੌਕਰੀ ਦੀ ਪੇਸ਼ਕਸ਼, ਤਨਖ਼ਾਹ ਦੀ ਨਿਰਧਾਰਤ ਹੱਦ ਅਤੇ ਲਾਇਸੈਂਸਸ਼ੁਦਾ ਸਪਾਂਸਰ ਦੀਆਂ ਸ਼ਰਤਾਂ ਪੂਰੀਆਂ ਕਰਨਾ ਲਾਜ਼ਮੀ ਹੈ।
