ਓਨਟਾਰੀਓ ਟੀਚਰਜ਼ ਪੈਨਸ਼ਨ ਪਲਾਨ ਨੇ ਏਆਈ ਕੰਪਨੀ ਹਾਰਵੀ ਵਿੱਚ 5 ਕਰੋੜ ਅਮਰੀਕੀ ਡਾਲਰ ਕੀਤੇ ਨਿਵੇਸ਼

ਟੋਰਾਂਟੋ : ਆਪਣਾ ਪੰਜਾਬ ਮੀਡੀਆ : ਓਨਟਾਰੀਓ ਟੀਚਰਜ਼ ਪੈਨਸ਼ਨ ਪਲਾਨ ਨੇ ਕਾਨੂੰਨੀ ਖੇਤਰ ਲਈ ਆਰਟੀਫਿਸ਼ਲ ਇੰਟੈਲੀਜੈਂਸ (ਏਆਈ) ਟੂਲ ਵਿਕਸਤ ਕਰਨ ਵਾਲੀ ਕੈਨੇਡੀਅਨ ਕੰਪਨੀ ਹਾਰਵੀ ਵਿੱਚ 50 ਮਿਲੀਅਨ ਅਮਰੀਕੀ ਡਾਲਰ ਦਾ ਨਿਵੇਸ਼ ਕੀਤਾ ਹੈ। ਇਹ ਨਿਵੇਸ਼ ਟੀਚਰਜ਼ ਵੈਂਚਰ ਗ੍ਰੋਥ ਵੱਲੋਂ ਕੀਤਾ ਗਿਆ। ਇਹ ਨਿਵੇਸ਼ ਹਾਰਵੀ ਵੱਲੋਂ ਹਾਲ ਹੀ ਵਿੱਚ ਇਕੱਠੇ ਕੀਤੇ ਗਏ 600 ਮਿਲੀਅਨ ਅਮਰੀਕੀ ਡਾਲਰ ਦੇ ਫੰਡਿੰਗ ਰਾਊਂਡ ਦਾ ਹਿੱਸਾ ਹੈ। ਇਸ ਫੰਡਿੰਗ ਦੀ ਅਗਵਾਈ ਡਿਫਿਊਜ਼ਨ ਅਤੇ ਲਾਈਟਸਪੀਡ ਵੈਂਚਰ ਪਾਰਟਨਰਜ਼ ਨੇ ਸਾਂਝੇ ਤੌਰ ’ਤੇ ਕੀਤੀ। ਹਾਰਵੀ ਕਾਨੂੰਨੀ ਫਰਮਾਂ ਲਈ ਅਜਿਹੇ ਏਆਈ ਟੂਲ ਤਿਆਰ ਕਰਦੀ ਹੈ ਜੋ ਕਾਂਟ੍ਰੈਕਟ ਵਿਸ਼ਲੇਸ਼ਣ, ਡਿਊ ਡਿਲੀਜੈਂਸ, ਕਾਨੂੰਨੀ ਪਾਲਣਾ ਅਤੇ ਮੁਕੱਦਮਿਆਂ ਨਾਲ ਜੁੜੇ ਕੰਮਾਂ ਨੂੰ ਸੁਚਾਰੂ ਬਣਾਉਣ ਵਿੱਚ ਮਦਦ ਕਰਦੇ ਹਨ। ਕੰਪਨੀ ਮੁਤਾਬਕ ਇਸ ਦੇ ਏਆਈ ਟੂਲ ਦੁਨੀਆ ਭਰ ਵਿੱਚ 3,000 ਤੋਂ ਵੱਧ ਗਾਹਕਾਂ ਵੱਲੋਂ ਵਰਤੇ ਜਾ ਰਹੇ ਹਨ। ਟੀਚਰਜ਼ ਵੈਂਚਰ ਗ੍ਰੋਥ ਦੇ ਸੀਨੀਅਰ ਮੈਨੇਜਿੰਗ ਡਾਇਰੈਕਟਰ ਰਿਕ ਪ੍ਰੋਸਟਕੋ ਨੇ ਕਿਹਾ ਕਿ ਹਾਰਵੀ ਨੇ ਕੈਨੇਡੀਅਨ ਗਾਹਕਾਂ ਵਿੱਚ ਮਜ਼ਬੂਤ ਸਥਿਤੀ ਬਣਾਈ ਹੈ। ਉਨ੍ਹਾਂ ਮੁਤਾਬਕ ਕੈਨੇਡਾ ਦੀ ਇੱਕ ਸੰਸਥਾ ਹੋਣ ਦੇ ਨਾਤੇ ਓਨਟਾਰੀਓ ਟੀਚਰਜ਼ ਪੈਨਸ਼ਨ ਪਲਾਨ ਕੰਪਨੀ ਦੇ ਵਿਕਾਸ ਨੂੰ ਤੇਜ਼ ਕਰਨ ਵਿੱਚ ਮਦਦ ਕਰ ਸਕਦਾ ਹੈ।