ਨਿਊਯਾਰਕ ਵਿੱਚ ਸੈਮੀਕੰਡਕਟਰ ਨਿਰਮਾਣ ਨੂੰ ਮਿਲੇਗਾ ਹੁਲਾਰਾ; ਪ੍ਰੋਜੈਕਟ ਨਾਲ ਹਜ਼ਾਰਾਂ ਨੌਕਰੀਆਂ ਪੈਦਾ ਹੋਣ ਦੀ ਉਮੀਦ।
ਵਾਸ਼ਿੰਗਟਨ : ਆਪਣਾ ਪੰਜਾਬ ਮੀਡੀਆ : ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਜਾਪਾਨ ਦੇ ਸਹਿਯੋਗ ਨਾਲ ਅਮਰੀਕਾ ਵਿੱਚ ਦੋ ਨਵੀਆਂ ਸੈਮੀਕੰਡਕਟਰ ਚਿੱਪ ਫੈਕਟਰੀਆਂ ਸਥਾਪਤ ਕਰਨ ਲਈ 21 ਅਰਬ ਡਾਲਰ ਤੱਕ ਦੇ ਨਿਵੇਸ਼ ਦਾ ਐਲਾਨ ਕੀਤਾ ਹੈ। ਇਹ ਪ੍ਰੋਜੈਕਟ ਨਿਊਯਾਰਕ ਰਾਜ ਦੇ ਮਾਲਟਾ ਇਲਾਕੇ ਵਿੱਚ ਲਾਗੂ ਕੀਤਾ ਜਾਵੇਗਾ ਅਤੇ ਇਸ ਦਾ ਸੰਚਾਲਨ ਗਲੋਬਲਫਾਊਂਡਰੀਜ਼ ਕੰਪਨੀ ਕਰੇਗੀ। ਇਸ ਪਹਿਲ ਦਾ ਉਦੇਸ਼ ਅਮਰੀਕਾ ਵਿੱਚ ਚਿੱਪ ਨਿਰਮਾਣ ਸਮਰੱਥਾ ਵਧਾਉਣਾ, ਘਰੇਲੂ ਸਪਲਾਈ ਚੇਨ ਨੂੰ ਮਜ਼ਬੂਤ ਕਰਨਾ ਅਤੇ ਵਿਦੇਸ਼ੀ ਉਤਪਾਦਨ ’ਤੇ ਨਿਰਭਰਤਾ ਘਟਾਉਣਾ ਹੈ। ਟਰੰਪ ਨੇ ਇਸ ਨਿਵੇਸ਼ ਨੂੰ ਅਮਰੀਕੀ ਉਦਯੋਗ ਅਤੇ ਰੁਜ਼ਗਾਰ ਲਈ ਮਹੱਤਵਪੂਰਨ ਕਦਮ ਦੱਸਿਆ ਹੈ।
ਯੋਜਨਾ ਦੇ ਪਹਿਲੇ ਪੜਾਅ ਵਿੱਚ ਲਗਭਗ 10 ਅਰਬ ਡਾਲਰ ਨਾਲ ਨਵੀਂ ਚਿੱਪ ਫੈਕਟਰੀ ਬਣਾਈ ਜਾਵੇਗੀ, ਜਿਸ ਦੇ 2029 ਵਿੱਚ ਉਤਪਾਦਨ ਸ਼ੁਰੂ ਕਰਨ ਦੀ ਉਮੀਦ ਹੈ। ਦੂਜੀ ਫੈਕਟਰੀ ਲਈ ਵੀ ਲਗਭਗ 10 ਅਰਬ ਡਾਲਰ ਦਾ ਵਾਧੂ ਨਿਵੇਸ਼ ਪ੍ਰਸਤਾਵਿਤ ਹੈ। ਜਾਪਾਨ ਇਸ ਪ੍ਰੋਜੈਕਟ ਲਈ ਪੂੰਜੀ ਮੁਹੱਈਆ ਕਰਵਾਏਗਾ, ਜਦਕਿ ਗਲੋਬਲਫਾਊਂਡਰੀਜ਼ ਤਕਨੀਕੀ ਮੁਹਾਰਤ ਅਤੇ ਫੈਕਟਰੀਆਂ ਦੇ ਸੰਚਾਲਨ ਦੀ ਜ਼ਿੰਮੇਵਾਰੀ ਨਿਭਾਏਗੀ। ਕੰਪਨੀ ਦੇ ਅਨੁਮਾਨ ਅਨੁਸਾਰ, ਦੋਵੇਂ ਫੈਕਟਰੀਆਂ ਪੂਰੀ ਤਰ੍ਹਾਂ ਚਾਲੂ ਹੋਣ ’ਤੇ ਹਰ ਸਾਲ ਵੱਡੀ ਮਾਤਰਾ ਵਿੱਚ ਸੈਮੀਕੰਡਕਟਰ ਵੇਫਰ ਤਿਆਰ ਕਰਨਗੀਆਂ।
ਇਸ ਪ੍ਰੋਜੈਕਟ ਨਾਲ ਉਸਾਰੀ ਅਤੇ ਸਪਲਾਈ ਚੇਨ ਨਾਲ ਜੁੜੀਆਂ ਲਗਭਗ 27,000 ਨੌਕਰੀਆਂ ਅਤੇ 1,000 ਤੋਂ ਵੱਧ ਉੱਚ ਹੁਨਰ ਵਾਲੀਆਂ ਨਿਰਮਾਣ ਨੌਕਰੀਆਂ ਪੈਦਾ ਹੋਣ ਦੀ ਉਮੀਦ ਹੈ। ਇਨ੍ਹਾਂ ਫੈਕਟਰੀਆਂ ਵਿੱਚ ਤਿਆਰ ਹੋਣ ਵਾਲੀਆਂ ਚਿੱਪਾਂ ਦੀ ਵਰਤੋਂ ਵਾਹਨਾਂ, ਉਦਯੋਗਿਕ ਮਸ਼ੀਨਰੀ, ਸੰਚਾਰ ਪ੍ਰਣਾਲੀਆਂ ਅਤੇ ਹੋਰ ਤਕਨੀਕੀ ਉਪਕਰਣਾਂ ਵਿੱਚ ਕੀਤੀ ਜਾਵੇਗੀ। ਇਹ ਨਿਵੇਸ਼ ਅਮਰੀਕਾ ਅਤੇ ਜਾਪਾਨ ਵਿਚਾਲੇ ਵੱਡੇ ਵਪਾਰਕ ਸਮਝੌਤੇ ਦਾ ਹਿੱਸਾ ਹੈ, ਜਿਸ ਦਾ ਮਕਸਦ ਦੋਵਾਂ ਦੇਸ਼ਾਂ ਵਿਚਾਲੇ ਉਦਯੋਗਿਕ ਸਹਿਯੋਗ ਅਤੇ ਮਹੱਤਵਪੂਰਨ ਤਕਨਾਲੋਜੀ ਦੀ ਸਪਲਾਈ ਨੂੰ ਮਜ਼ਬੂਤ ਕਰਨਾ ਹੈ।
