ਕਾਕਪਿਟ ’ਚ ਝਗੜੇ ਮਗਰੋਂ ਜਹਾਜ਼ ਤੇਜ਼ੀ ਨਾਲ ਹੇਠਾਂ ਆਇਆ, ਯਾਤਰੀਆਂ ਤੇ ਕਰੂ ਨੇ ਹਮਲਾਵਰ ਨੂੰ ਕਾਬੂ ਕੀਤਾ
ਦੁਬਈ/ਤੇਲ ਅਵੀਵ : ਆਪਣਾ ਪੰਜਾਬ ਮੀਡੀਆ : ਦੁਬਈ ਤੋਂ ਤੇਲ ਅਵੀਵ ਜਾ ਰਹੀ ਫਲਾਈਦੁਬਈ ਦੀ FZ1073 ਉਡਾਣ ਵਿੱਚ ਕਾਕਪਿਟ ਅੰਦਰ ਕੋ-ਪਾਇਲਟ ਵੱਲੋਂ ਕਪਤਾਨ ’ਤੇ ਚਾਕੂ ਨਾਲ ਹਮਲਾ ਕਰਨ ਦੀ ਘਟਨਾ ਸਾਹਮਣੇ ਆਈ ਹੈ। ਘਟਨਾ ਤੋਂ ਬਾਅਦ ਜਹਾਜ਼ ਲਗਭਗ 14,000 ਫੁੱਟ ਦੀ ਉਚਾਈ 30 ਸਕਿੰਟਾਂ ਤੋਂ ਵੀ ਘੱਟ ਸਮੇਂ ਵਿੱਚ ਗੁਆ ਬੈਠਾ ਅਤੇ ਐਮਰਜੈਂਸੀ ਸਥਿਤੀ ਪੈਦਾ ਹੋ ਗਈ।
ਇਸ ਦੌਰਾਨ ਜ਼ਖ਼ਮੀ ਕਪਤਾਨ ਨੇ ਕਾਕਪਿਟ ਦਾ ਦਰਵਾਜ਼ਾ ਖੋਲ੍ਹਣ ਵਿੱਚ ਸਫਲਤਾ ਹਾਸਲ ਕੀਤੀ, ਜਿਸ ਤੋਂ ਬਾਅਦ ਕੁਝ ਯਾਤਰੀ ਅਤੇ ਕਰੂ ਮੈਂਬਰ ਅੰਦਰ ਪਹੁੰਚੇ ਅਤੇ ਕੋ-ਪਾਇਲਟ ਨੂੰ ਕਾਬੂ ਕੀਤਾ। ਜਹਾਜ਼ ਵਿੱਚ ਮੌਜੂਦ ਇੱਕ ਹੋਰ ਰਿਜ਼ਰਵ ਫਲਾਈਦੁਬਈ ਕਰੂ ਨੇ ਕੰਟਰੋਲ ਸੰਭਾਲਿਆ ਅਤੇ ਜਹਾਜ਼ ਨੂੰ ਸਾਊਦੀ ਅਰਬ ਦੇ ਤਾਬੂਕ ਹਵਾਈ ਅੱਡੇ ’ਤੇ ਸੁਰੱਖਿਅਤ ਉਤਾਰਿਆ ਗਿਆ।
ਘਟਨਾ ਵਿੱਚ ਜ਼ਖ਼ਮੀ ਕਪਤਾਨ ਦੀ ਪਛਾਣ ਭਾਰਤੀ ਪਾਇਲਟ ਸਮਿਤ ਮੱਛਰ ਵਜੋਂ ਹੋਈ ਹੈ। ਇਜ਼ਰਾਈਲੀ ਅਧਿਕਾਰੀਆਂ ਨੇ ਹਮਲੇ ਦੇ ਮਕਸਦ ਬਾਰੇ ਜਾਂਚ ਜਾਰੀ ਹੋਣ ਦੀ ਗੱਲ ਕਹੀ ਹੈ, ਜਦਕਿ ਫਲਾਈਦੁਬਈ ਨੇ ਵੀ ਲੋਕਾਂ ਨੂੰ ਜਾਂਚ ਪੂਰੀ ਹੋਣ ਤੋਂ ਪਹਿਲਾਂ ਕਿਸੇ ਨਤੀਜੇ ’ਤੇ ਨਾ ਪਹੁੰਚਣ ਦੀ ਅਪੀਲ ਕੀਤੀ ਹੈ। ਯਾਤਰੀਆਂ ਨੂੰ ਬਾਅਦ ਵਿੱਚ ਬਦਲਵੀਂ ਉਡਾਣ ਰਾਹੀਂ ਤੇਲ ਅਵੀਵ ਪਹੁੰਚਾਇਆ ਗਿਆ।
