ਆਪਣਾ ਪੰਜਾਬ ਮੀਡੀਆ : ਟੋਰਾਂਟੋ ਟਰਾਂਜ਼ਿਟ ਕਮਿਸ਼ਨ ਅਤੇ ਇਸ ਦੇ ਇਲੈਕਟ੍ਰੀਕਲ ਤੇ ਸਿਗਨਲ ਵਰਕਰਾਂ ਦੀ ਯੂਨੀਅਨ ਵਿਚਾਲੇ ਅਸਥਾਈ ਸਮਝੌਤਾ ਹੋ ਗਿਆ ਹੈ, ਜਿਸ ਨਾਲ ਫੀਫਾ ਵਰਲਡ ਕੱਪ 2026 ਤੋਂ ਪਹਿਲਾਂ ਸੰਭਾਵਿਤ ਟ੍ਰਾਂਜ਼ਿਟ ਵਿਘਨ ਦਾ ਖਤਰਾ ਟਲ ਗਿਆ ਹੈ।
ਟੀਟੀਸੀ ਦੇ ਸੀਈਓ ਮਨਦੀਪ ਲਾਲੀ ਨੇ ਇਸ ਨੂੰ “ਇੱਕ ਸਾਲ ਦਾ ਬ੍ਰਿਜ ਡੀਲ” ਕਰਾਰ ਦਿੱਤਾ। ਇਹ ਸਮਝੌਤਾ ਹਫ਼ਤੇ ਦੇ ਅੰਤ ਦੌਰਾਨ ਦੋ ਵਾਰ ਮਿਆਦ ਵਧਾਉਣ ਤੋਂ ਬਾਅਦ ਹੋਇਆ। ਉਨ੍ਹਾਂ ਕਿਹਾ ਕਿ ਇਸ ਡੀਲ ਨਾਲ ਟੀਟੀਸੀ ਨੂੰ ਹੁਨਰਮੰਦ ਕਰਮਚਾਰੀਆਂ ਨੂੰ ਆਕਰਸ਼ਿਤ ਕਰਨ, ਰੋਕਣ ਅਤੇ ਬਾਜ਼ਾਰ ਦੇ ਅਨੁਕੂਲ ਤਨਖਾਹ ਦੇਣ ਵਿੱਚ ਮਦਦ ਮਿਲੇਗੀ। ਨਾਲ ਹੀ ਇਹ ਕਰਮਚਾਰੀਆਂ, ਯਾਤਰੀਆਂ ਅਤੇ ਸ਼ਹਿਰ ਲਈ ਸਥਿਰਤਾ ਯਕੀਨੀ ਬਣਾਏਗਾ।
ਕਿਊਪ ਲੋਕਲ 2, ਜੋ ਕਰੀਬ 700 ਕਮਿਊਨੀਕੇਸ਼ਨ, ਇਲੈਕਟ੍ਰਿਕਲ ਅਤੇ ਸਿਗਨਲ ਵਰਕਰਾਂ ਦੀ ਨੁਮਾਇੰਦਗੀ ਕਰਦੀ ਹੈ, ਨੇ ਵੀ ਸਮਝੌਤੇ ‘ਤੇ ਖੁਸ਼ੀ ਜਤਾਈ। ਯੂਨੀਅਨ ਪ੍ਰਧਾਨ ਸੁਮੀਤ ਗੁਲੇਰੀਆ ਨੇ ਕਿਹਾ ਕਿ ਇਹ ਸਮਝੌਤਾ ਮੈਂਬਰਾਂ ਦੀ ਏਕਤਾ ਅਤੇ ਸਖਤ ਮਿਹਨਤ ਦਾ ਨਤੀਜਾ ਹੈ। ਸਮਝੌਤੇ ਦੇ ਵੇਰਵੇ ਹਾਲੇ ਜਾਰੀ ਨਹੀਂ ਕੀਤੇ ਗਏ ਕਿਉਂਕਿ ਇਸ ਨੂੰ ਟੀਟੀਸੀ ਬੋਰਡ ਅਤੇ ਯੂਨੀਅਨ ਮੈਂਬਰਾਂ ਤੋਂ ਮਨਜ਼ੂਰੀ ਮਿਲਣੀ ਬਾਕੀ ਹੈ। ਪਿਛਲੇ ਹਫ਼ਤੇ ਯੂਨੀਅਨ ਨੇ ਕਿਹਾ ਸੀ ਕਿ ਤਨਖਾਹ ਅਤੇ ਡਿਊਟੀ ਸ਼ਡਿਊਲ ਗੱਲਬਾਤ ਦੇ ਮੁੱਖ ਮਸਲੇ ਸਨ।
