ਏਸ਼ੀਅਨ ਗੇਮਜ਼ ਦੇ ਪੁਰਸ਼ ਸਕਿਫ ਮੁਕਾਬਲੇ ’ਚ ਭਾਰਤੀ ਜੋੜੀ ਨੇ ਜਿੱਤਿਆ ਸਿਲਵਰ ਮੈਡਲ
ਆਇਚੀ-ਨਾਗੋਯਾ : ਆਪਣਾ ਪੰਜਾਬ ਮੀਡੀਆ : ਏਸ਼ੀਅਨ ਗੇਮਜ਼ 2026 ਵਿੱਚ ਭਾਰਤ ਦੇ ਮਨੂ ਫ੍ਰਾਂਸਿਸ ਅਤੇ ਪ੍ਰਿੰਸ ਨੋਬਲ ਨੇ ਸੇਲਿੰਗ ਦੇ ਪੁਰਸ਼ ਸਕਿਫ ਮੁਕਾਬਲੇ ਵਿੱਚ ਸਿਲਵਰ ਮੈਡਲ ਜਿੱਤ ਲਿਆ ਹੈ। ਭਾਰਤੀ ਜੋੜੀ ਨੇ 9 ਰੇਸਾਂ ਤੋਂ ਬਾਅਦ ਕੁੱਲ 23 ਅੰਕਾਂ ਨਾਲ ਦੂਜਾ ਸਥਾਨ ਹਾਸਲ ਕੀਤਾ।
ਚੀਨ ਦੇ ਵੇਨ ਜ਼ਾਇਡਿੰਗ ਅਤੇ ਲਿਊ ਤਿਆਨ ਦੀ ਜੋੜੀ 16 ਅੰਕਾਂ ਨਾਲ ਪਹਿਲੇ ਸਥਾਨ ’ਤੇ ਰਹੀ, ਜਦਕਿ ਹਾਂਗਕਾਂਗ ਨੇ ਕਾਂਸੀ ਦਾ ਤਮਗਾ ਜਿੱਤਿਆ। ਮਨੂ ਫ੍ਰਾਂਸਿਸ ਅਤੇ ਪ੍ਰਿੰਸ ਨੋਬਲ ਨੇ 49er ਕਲਾਸ ਵਿੱਚ ਮੁਕਾਬਲਾ ਕਰਦਿਆਂ 9 ਰੇਸਾਂ ਵਿੱਚੋਂ ਇੱਕ ਰੇਸ ਆਪਣੇ ਨਾਮ ਵੀ ਕੀਤੀ।
ਇਹ ਮੌਜੂਦਾ ਏਸ਼ੀਅਨ ਗੇਮਜ਼ ਵਿੱਚ ਸੇਲਿੰਗ ਵਿੱਚ ਭਾਰਤ ਦਾ ਪਹਿਲਾ ਤਮਗਾ ਹੈ। 31 ਸਾਲਾ ਮਨੂ ਫ੍ਰਾਂਸਿਸ ਅਤੇ 30 ਸਾਲਾ ਪ੍ਰਿੰਸ ਨੋਬਲ ਕੋਚੀ ਨਾਲ ਸਬੰਧਤ ਹਨ ਅਤੇ ਦੋਵੇਂ ਬਚਪਨ ਦੇ ਦੋਸਤ ਹਨ। ਉਨ੍ਹਾਂ ਦੀ ਇਸ ਉਪਲਬਧੀ ਨਾਲ ਏਸ਼ੀਅਨ ਗੇਮਜ਼ ਵਿੱਚ ਭਾਰਤ ਦੇ ਕੁੱਲ ਤਮਗਿਆਂ ਦੀ ਗਿਣਤੀ 62 ਹੋ ਗਈ ਹੈ।
