ਭੁਲੱਥ ਸਬ-ਡਿਵੀਜ਼ਨ ਦੇ ਸੱਤ ਨੌਜਵਾਨ ਵਤਨ ਪਰਤੇ
ਭੁਲੱਥ : ਆਪਣਾ ਪੰਜਾਬ ਮੀਡੀਆ : ਅਮਰੀਕਾ ਤੋਂ ਇਕੋ ਜਹਾਜ਼ ਵਿੱਚ ਵਤਨ ਪਰਤੇ ਭੁਲੱਥ ਸਬ-ਡਿਵੀਜ਼ਨ ਦੇ ਸੱਤ ਨੌਜਵਾਨਾਂ ਦੀ ਵਾਪਸੀ ਨਾਲ ਉਨ੍ਹਾਂ ਦੇ ਘਰਾਂ ’ਚ ਸੋਗ ਹੈ। ਇਨ੍ਹਾਂ ਨੌਜਵਾਨਾਂ ਦੇ ਪਰਿਵਾਰ ਏਜੰਟਾਂ ਵੱਲੋਂ ਕੀਤੇ ਧੋਖੇ ਨੂੰ ਬਿਆਨਦੇ ਨਜ਼ਰ ਆਏ ਪਰ ਫਿਰ ਵੀ ਉਹ ਏਜੰਟਾਂ ਖ਼ਿਲਾਫ਼ ਕਾਰਵਾਈ ਵਾਸਤੇ ਮੂੰਹ ਖੋਲ੍ਹਣ ਲਈ ਤਿਆਰ ਨਹੀਂ। ਇਸ ਦੌਰਾਨ ਪਿੰਡ ਬਾਗੜੀਆਂ ਦੇ ਤਰਜੀਤ ਸਿੰਘ ਪੁੱਤਰ ਬਲਵੀਰ ਸਿੰਘ ਨੇ ਜਿੱਥੇ 25 ਜਨਵਰੀ ਨੂੰ ਅਮਰੀਕਾ ਪਹੁੰਚਣ ’ਤੇ ਜੇਲ੍ਹ ਵਿਚ ਅਮਰੀਕਨ ਅਧਿਕਾਰੀਆਂ ਦੇ ਮਾੜੇ ਵਿਹਾਰ ਬਾਰੇ ਗੱਲ ਕੀਤੀ ਉਥੇ ਇਸੇ ਹੀ ਪਿੰਡ ਦੇ ਸੁਖਰਾਜ ਸਿੰਘ ਤੇ ਮਨਿੰਦਰ ਸਿੰਘ ਵਲੋਂ ਸਦਮੇ ’ਚ ਹੋਣ ਕਾਰਨ ਕਿਸੇ ਵੀ ਤਰ੍ਹਾਂ ਗੱਲਬਾਤ ਕਰਨ ਤੋਂ ਨਾਂਹ ਕਰ ਦਿੱਤੀ। ਖ਼ਾਸਕਰ ਏਜੰਟ ਬਾਰੇ ਗੱਲਬਾਤ ਕਰਨ ਬਾਰੇ ਬੋਲਣ ਤੋਂ ਇਨਕਾਰ ਕਰ ਦਿੱਤਾ। ਇਸ ਤਰ੍ਹਾਂ ਪਿੰਡ ਪੰਡੋਰੀ ਦਾ ਜਸ਼ਨਪ੍ਰੀਤ ਯੂਰਪ ਵਿਚ ਕੰਮ ਨਾ ਮਿਲਣ ਕਾਰਨ ਅਮਰੀਕਾ ਵੱਲ ਮੋਟੀ ਰਕਮ ਕਰਜ਼ਾ ਚੁੱਕ ਕੇ ਗਿਆ ਸੀ।
